لاہور: پاکستان کرکٹ بورڈ نے ویسٹ انڈیز کے خلاف آئی سی سی ورلڈ ٹیسٹ چیمپئن شپ کے تحت دو ٹیسٹ میچز کے لیے 15 رکنی اسکواڈ کا اعلان کر دیا ہے۔ یہ میچز 17 سے 21 جنوری اور 25 سے 29 جنوری کے درمیان ملتان میں کھیلے جائیں گے۔
اعلان کردہ اسکواڈ میں جنوبی افریقہ کے حالیہ دورے کی ٹیم میں سات تبدیلیاں کی گئی ہیں۔ اسکواڈ میں شامل مستقل کھلاڑیوں میں شان مسعود (کپتان)، سعود شکیل (نائب کپتان)، بابر اعظم، کامران غلام، خرم شہزاد، محمد رضوان، نعمان علی، اور سلمان علی آغا شامل ہیں۔
اسپن بالنگ کو مضبوط کرنے کے لیے لیگ اسپنر ابرار احمد کی واپسی کی گئی ہے، جو آف اسپنر ساجد خان اور لیفٹ آرم اسپنر نعمان علی کے ساتھ کھیلیں گے۔ زخمی صائم ایوب اور ناقص فارم کے شکار عبداللہ شفیق کی جگہ اوپنرز امام الحق اور محمد ہریرہ کو اسکواڈ میں شامل کیا گیا ہے۔
یہ بھی پڑھیں: پاکستان کرکٹ 2025: بڑی انٹرنیشنل ٹیموں اور شاندار ٹورنامنٹس کے ساتھ ایکشن سے بھرپور سال
ورک لوڈ مینجمنٹ کے تحت عامر جمال، محمد عباس، میر حمزہ اور نسیم شاہ کو آرام دیا گیا ہے۔ ان کی جگہ خرم شہزاد کو برقرار رکھتے ہوئے محمد علی کی واپسی اور نئے کھلاڑی کاشف علی کی شمولیت کی گئی ہے۔
وکٹ کیپر حسیب اللہ کی عدم دستیابی کے باعث، جو جنوبی افریقہ کے دورے میں زخمی ہوئے تھے، پاکستان انڈر 19 کے سابق کپتان اور شاہینز ٹیم کے قائد روحیل نذیر کو اسکواڈ میں شامل کیا گیا ہے۔
پاکستانی اسکواڈ برائے ویسٹ انڈیز ٹیسٹ سیریز:
شان مسعود (کپتان)، سعود شکیل (نائب کپتان)، ابرار احمد، بابر اعظم، امام الحق، کامران غلام، کاشف علی، خرم شہزاد، محمد علی، محمد ہریرہ، محمد رضوان (وکٹ کیپر/بیٹر)، نعمان علی، روحیل نذیر (وکٹ کیپر/بیٹر)، ساجد خان، سلمان علی آغا۔