سمیر احمد کو آئی سی سی چیمپئنز ٹرافی کا ٹورنامنٹ ڈائریکٹر مقرر کر دیا گیا۔پاکستان کرکٹ بورڈ (پی سی بی) نے پریس ریلیز جاری کرتے ہوئے بتایا کہ پی سی بی کے چیف آپریٹنگ آفیسر، سمیر احمد سید کو آئی سی سی چیمپئنز ٹرافی 2025 کے لیے ٹورنامنٹ ڈائریکٹر مقرر کیا گیا ہے۔ یہ ایونٹ پاکستان میں منعقد ہوگا۔
چیئرمین پی سی بی محسن نقوی کا بیان
“سمیر ایک نہایت منظم اور تجربہ کار ایڈمنسٹریٹر ہیں جن کے پاس کرکٹ کے حوالے سے بے پناہ جوش و جذبہ ہے۔ مجھے پورا یقین ہے کہ وہ آئی سی سی چیمپئنز ٹرافی 2025 کو کھلاڑیوں، آفیشلز اور شائقین کے لیے یادگار ایونٹ بنائیں گے۔
“آئی سی سی چیمپئنز ٹرافی 2025 پاکستان کی عالمی معیار کے کرکٹ ایونٹس کی میزبانی کی صلاحیت کو نمایاں کرے گی۔ یہ ایونٹ دنیا بھر کے کھلاڑیوں اور شائقین کو پاکستان کی کرکٹ سے محبت اور روایتی مہمان نوازی کا تجربہ کرنے کا موقع فراہم کرے گا۔
“یہ ٹورنامنٹ پاکستان کی حالیہ تاریخ کا سب سے بڑا اسپورٹس ایونٹ ہے۔ سمیر کی قیادت میں، عالمی کرکٹ برادری اس بات کا یقین رکھ سکتی ہے کہ یہ ایونٹ بہترین معیار کے مطابق ہوگا، جو پاکستان کی پہچان ہے۔”
یہ بھی پڑھیں: پاکستان مان گیا ،آئی سی سی نے چیمپئنز ٹرافی ٹور کا نیا شیڈول جاری کر دیا
ٹورنامنٹ ڈائریکٹر سمیر احمد سید کا بیان
“میرے لیے یہ ایک بہت بڑا اعزاز اور خوشی کی بات ہے کہ مجھے اس اہم ذمہ داری کے لیے منتخب کیا گیا ہے۔ یہ ٹورنامنٹ پاکستان کرکٹ بورڈ، ہمارے شائقین اور سپورٹرز کے لیے بے حد اہمیت رکھتا ہے۔
“تیاریوں کا عمل زور و شور سے جاری ہے، اسٹیڈیمز کی اپ گریڈیشن کا کام آخری مراحل میں ہے، اور انٹرنیشنل کرکٹ کونسل کے ساتھ اہم معاملات پر تبادلہ خیال کیا جا رہا ہے۔
“ہمارا تجربہ کار ایونٹس ٹیم، جو نو مرتبہ ایچ بی ایل پاکستان سپر لیگ کے کثیر ٹیم ایونٹس کی کامیاب منصوبہ بندی اور عملدرآمد کر چکی ہے، اس ٹورنامنٹ کی کامیابی میں اہم کردار ادا کرے گی۔
“میں ان کے ساتھ اور انٹرنیشنل کرکٹ کونسل کے ساتھ قریبی اشتراک سے کام کرنے کے لیے پرعزم ہوں تاکہ آئی سی سی چیمپئنز ٹرافی کے پچھلے ایڈیشنز کے مقرر کردہ معیار کو عبور کیا جا سکے۔”